फेसबुक द्वारे मुख्यमंत्र्यांनी जनतेशी साधला संवाद , करोनासंबंधी माहितीसाठी व्हॉट्सअॅप नंबर
महाराष्ट्र मुख्यमंत्र्यांनी आज फेसबुकच्या माध्यमातून जनतेशी संवाद साधला. यावेळी त्यांनी सांगितलं की, "पंतप्रधान मोदींनीही तुमच्याशी संवाद साधलाआहे. त्यांनी अत्यंत गांभीर्याने निवेदन दिलं. हे निवेदन ऐकल्यानंतर मी पण थोडा वेळ चरकलो. लॉकडाउन, घराबाहेर पडायचं नाही ही गोष्ट कोणाच्याही काळजाचा ठोका चुकवणारी आहे.
पण अत्यावश्यक सेवा सुरू राहणार आहेत. कोणीही घाबरून जाऊ नये .
गांभीर्य ओळखा,घाबरु नका, पण काळजी घ्या
"अनेक दुकानांमध्ये झुंबड उडाल्याचं कळत आहे. गैरसमज करुन घेऊ नका,कोणीही गोंधळून जाऊ नका. जीवनाश्यक सेवा सुविधा कधीच बंद होणार नाहीत. पण संकट अतिशय गंभीर आहे. त्याचं गांभीर्य ओळखून घराबाहेर पडू नका. या रोगापासून वाचण्याचा हाच उपाय आहे. घाबरु नका, पण काळजी घ्या," या महामारीमुळे पंतप्रधानांनी मला युरोपमध्ये काय संकट निर्माण झालं आहे याची कल्पना दिलीआहे. ते वातावरण आणि परिस्थिती आपल्याकडे होऊ नये यासाठी काळजीपूर्वक पाऊलं उचलत आहोत. गैरसमज करुन घेऊ नका अशी विनंती मुख्यमंत्र्यांनी यावेळी केली आहे.
गर्दी करणे टाळा साठा पुरेसा आहे
घराबाहेर पाऊल टाकलं तर संकट घरात पाऊल टाकेल. अशी परिस्थिती आहे म्हणून,आपण हे सगळं संकटातून बाहेर पडण्यासाठी करत आहोत. दुकानांमध्ये गर्दी करु नका, घाबरु नका. धान्याचा पुरेसा साठा आहे. घऱी उगाच साठा करु नका. संकटाची भीती मात्र दूर होऊ देऊ नका," असंही यावेळी ते म्हणाले.
कोणाला काही शंका तर या नंबर वर विचारा माहिती
सर्वसामान्यांना करोनासंबंधी माहिती मिळावी यासाठी राज्य सरकारकडून एक सुविधा उपलब्ध करण्यात आली आहे. करोनासंबंधी माहिती देण्यासाठी व्हॉट्सअॅपवर चॅटबोट ही सुविधा राज्य सरकारकडून सुरु करण्यात आली आहे. यासाठी राज्य सरकारने +912026127394 हा क्रमांक दिला आहे. हा क्रमांक आपल्या फोनमध्ये सेव्ह करावा. या ग्रुपमध्ये आल्यानंतर करोनासंबंधी आपल्या मनातील जे प्रश्न, शंका असतील त्यांची माहिती मिळेल. सध्या ही सुविधा इंग्रजीत असून मराठीत आणण्याचा लवकरात लवकर प्रयत्न करत आहोत असेही मुख्यमंत्री म्हणाले.
