कोरोना व संचारबंदी च्या काळात आदिवासी पाड्यातील कुटुंबाना दिला मदतीचा हात
कोरोनाच्या साथीचे थैमान आणि देशातील संचारबंदी, या दोनीच्या कचाट्यात प्रत्येकजण सापडला आहे. घराबाहेर पडणे म्हणजे मृत्यूला घरात घेण्यासारखे आहे त्यामुळे सर्वसामान्य भयभीत झालेला आहे. हया परिस्थितीचा सामना करताना घरात खाण्यासाठी अन्नधान्याची चणचण त्यामुळे अनेक कुटुंबांचे हाल होण्याची शक्यता आहे. सध्याची परिस्थिती ही आणीबाणी सारखी आहे.
पाड्यावर राहणारा गरीब अशिक्षित असलेला आदिवासी समुदायाच्या मदतीला काही संस्था धावून येत आहेत, त्यामध्ये खारीचा वाटा उचलत आदिवासी पाड्यातील कुुटुंबाना लायन्स क्लब ऑफ रायझिंग स्टार आणि राजस्थानी सेवा संस्था,भाईंदर यांच्या वतीने मदतीचा हात पुढे केला आहे.
सरकार त्यांच्या पद्धतीने उपाययोजना करत आहे. अशा आपत्कालीन वेळी जनतेच्या मदतीला धावून जाणे गरजेचे आहे. गरीब व गरजू लोकांना दोन वेळेचं अन्न मिळणं ही सध्याची प्राथमिकता आहे.म्हणून काजु पाडा,घोडबंदर रोड येथील आदिवासी पाड्यावर महापौर ज्योत्सनाताई हसनाळे यांच्या हस्ते लायन्स क्लब ऑफ रायझिंग स्टार यांच्याकडून मास्क आणि सॅनिटाइजर व राजस्थानी सेवा संस्था,भाईंदर यांच्या वतीने सुमारे १०० गरीब आदिवासी कुटुंबाना १५ दिवस पुरेल एवढे अन्नधान्य (किराणा सामान) याचे मोफत वितरण करण्यात आले.यावेळी महापौरांसोबत राजस्थानी सेवा संस्थेचे अध्यक्ष नरेंद्र गुप्ता ,महासचिव विकास केडिया ,सुभाष सिंघानिया ,नरेश केडिया , लायन्स क्लबचे बबिता केडिया ,नितीश वर्मा, मनोज खेमका शिवमावळा प्रतिष्ठाण चे सुभाष काशिद,संतोष काशिद उपस्थित होते .या समाजकार्याबद्दल महापौरांनी सदर संस्थेचे कौतुक केले व आभार मानले. तसेच इतर ही स्वयंसेवी संस्थांनी लायन्स क्लब व राजस्थानी सेवा संस्था सारखे समाज कार्य करण्यास पुढाकार घ्यावा असे आवाहन त्यांनी केले.
